WORLD NEWS: న్యూజిలాండ్ పార్లమెంటులో ఇటీవల ఒక అరుదైన ఘటన చోటుచేసుకుంది. దేశానికి చెందిన ఎంపీ లారా మెక్ క్లూర్ డీప్ ఫేక్ అనే కృత్రిమ మేధస్సుతో తయారైన నకిలీ ఫోటోలు, వీడియోలపై తీవ్రంగా స్పందించారు. మహిళలపై జరుగుతున్న ఆన్‌లైన్ వేధింపులకు వ్యతిరేకంగా ఆమె నిరసనగా తన డీప్ ఫేక్ న్యూడ్ ఫొటోలను స్వయంగా పార్లమెంట్లో ప్రదర్శించారు.
- డీప్ ఫేక్ ఫోటోలతో మోసం
డీప్ ఫేక్ టెక్నాలజీ సహాయంతో వ్యక్తుల ముఖాన్ని, శరీర భాషను మార్చి అసత్యమైన, అశ్లీల కంటెంట్‌ను సృష్టించడం రోజురోజుకూ పెరిగిపోతున్న సంగతి తెలిసిందే. ముఖ్యంగా మహిళలను లక్ష్యంగా చేసుకొని ఇలా పలు నకిలీ ఫోటోలు, వీడియోలు రూపొందిస్తున్నారు. దీనివల్ల వారు మానసికంగా, సామాజికంగా హింసను ఎదుర్కొంటున్నారు.
- చట్టం అవసరం ఉందని ఎంపీ లారా స్పష్టం
లారా మెక్ క్లూర్ ఈ సమస్యను పార్లమెంట్లో ప్రస్తావిస్తూ “ఈ ఫొటోలు నిజమైనవి కావు. ఇవన్నీ నేను ఇంట్లో కూర్చొని AI టూల్స్‌తో రూపొందించాను. ఇవి ఎంత సులభంగా తయారవుతాయో నేను చూపించాలనుకున్నా. డీప్ ఫేక్ టెక్నాలజీని నియంత్రించడానికి చట్టాలు లేకపోవడం పెద్ద లోపం. ఇలాంటి ఫేక్ కంటెంట్ వల్ల జీవితాలు నాశనం అవుతున్నాయి,” అని తెలిపారు.
తాను ప్రదర్శించిన ఫోటోలు తానూ తలచుకొని తయారుచేసుకున్నప్పటికీ, నిజంగా బాధితులు ఇలాంటివి ఎదుర్కొంటున్న దుస్థితిని ఎత్తిచూపడమే తన ఉద్దేశమని ఎంపీ తెలిపారు. డీప్ ఫేక్‌ల వల్ల బాధపడే బాధితులకు న్యాయం దక్కేందుకు, బాధ్యులపై కఠిన చర్యలు తీసుకునేందుకు సమర్థవంతమైన చట్టం తీసుకురావాలని ఆమె కోరారు.
ఈ ఘటన ద్వారా డీప్ ఫేక్ అనే ప్రమాదకరమైన పరిణామాన్ని సమాజం ముందుకు తెచ్చిన లారా మెక్ క్లూర్‌కు నెటిజన్ల మద్దతు లభిస్తోంది. మహిళల గౌరవాన్ని, గోప్యతను కాపాడటంలో ఇదొక మైలురాయిగా నిలవొచ్చని భావిస్తున్నారు. డిజిటల్ యుగంలో మహిళల భద్రతకు, వ్యక్తిగత గోప్యతకు గౌరవం లభించాలంటే ఇలాంటి అభ్యుదయకరమైన చర్చలు, చట్టపరమైన మార్గదర్శకాలు అవసరం. లారా మెక్ క్లూర్ చేసిన ఈ చర్య ప్రజల్లో చైతన్యం తీసుకురావడమే కాదు, పాలకులను కూడా తగిన చర్యలు తీసుకునేలా చేస్తుందని ఆశిద్దాం.